មានមូលហេតុជាច្រើន ដែលអាចធ្វើឲ្យអ្នកមានបញ្ហាហើម ឬការចាល់ជាតិទឹកនៅក្នុងរាងកាយ ដែលអាចកើតឡើងបានដោយសារតែ៖
• ទម្លាប់នៃការរស់នៅប្រចាំថ្ងៃមិនល្អ ដូចជាការឈរ ឬអង្គុយយូរពេក
• ការបរិភោគអាហារកំប៉ុង និងមានជាតិប្រៃខ្ពស់
• ចរន្តឈាមរត់មិនបានល្អ
• ផលរំខាននៃការប្រើឱសថមួយចំនួន
• ការមានផ្ទៃពោះ
យោងតាមសម្តីរបស់លោកវេជ្ជបណ្ឌិត ចន អគ្រីស្តូហ្វឺរ (John R.Christoper) ដែលជាអ្នក និពន្ធ និងអ្នកជំនាញផ្នែកឱសថបុរាណរបស់អាមេរិក បានណែនាំថា ការទទួលទានតែជីវ៉ាន់ស៊ុយគឺអាចដោះស្រាយនូវបញ្ហាទាំងនេះបាន ។
អ្នកអាចបង្កើនបរិមាណនៃការទទួលទានតែជីវ៉ាន់ស៊ុយនេះ មួយកែវជារៀងរាល់ម៉ោង ប្រសិនបើអ្នកត្រូវការវា។ តែទោះជាយ៉ាងនេះក្តី លោកវេជ្ជបណ្ឌិតបានធ្វើការណែនាំបន្ថែមថា អ្នកគួរប្រើស្លឹកជីវ៉ាន់ស៊ុយខ្ចីស្រស់ រួមទាំងដើមនិងឬសរបស់វាប្រសិនបើមាន ។
វិធីណែនាំក្នុងការធ្វើ៖
១. ធ្វើការចិញ្ច្រាំស្លឹកនិងឬសរបស់វាឲ្យល្អិត ( អ្នកក៏អាចចិញ្ច្រាំវាទុក ហើយដាក់វាទៅក្នុងកែវកញ្ចក់បិទឲ្យជិតហើយដាក់វាក្នុងទូទឹកកក បានមួយអាទិត្យ) ។
២.ដាក់ស្លឹកជីវ៉ាន់ស៊ុយនេះឲ្យបាន1/4 នៃកែវចូលទៅក្នុងកំប៉ុងសម្រាប់ច្រោះឆុងតែ
៣.ដាក់វាចូលទៅក្នុងប៉ាន់ឬកែវសម្រាប់ឆុង ហើយចាក់ទឹកក្តៅចូល
៤. ទុកវាចោលឲ្យបាន ៥ ទៅ៧នាទី
៥.បន្ថែមទឹកឃ្មុំ ក្រូចឆ្មារ ឬខ្ញីដើម្បីបន្ថែមរសជាតិទៅតាមចំណង់ចំណូលចិត្តរបស់អ្នក
៦.ដើម្បីទទួលបានអត្ថប្រយោជន៍និងប្រសិទ្ធភាពរបស់វា អ្នកគួរផឹកតែជីវ៉ាន់ស៊ុយនេះ នៅពេលវានៅក្តៅឧណ្ឌៗនៅឡើយ។
ទន្ទឹមនឹងការព្យាបាលដោយការប្រើប្រាស់តែធម្មជាតិនេះ អ្នកក៏គប្បីអនុវត្តនូវវិធីសាស្ត្រមួយចំនួន ក្នុងការជួយកាត់បន្ថយអាការៈហើមផងដែរ ដូចជាការកល់ជើងឲ្យខ្ពស់ ដោយដាក់នៅលើខ្នើយ គឺដើម្បីលើកវាអោយខ្ពស់ជាងបេះដូង នៅពេលដែលអ្នកគេងនៅលើគ្រែ។ ក្នុងនោះផងដែរ អ្នកក៏ត្រូវធ្វើលំហាត់ប្រាណនៅជើង ដើម្បីជួយរុញច្រានសារធាតុរាវ ឲ្យត្រលប់ចូលទៅក្នុងបេះដូងវិញ ៕
